重慶又叫山城，顧名思義，都唔使我多講，今次從香港飛去，坐飛機大概兩個鐘就到，打左三個場，等我先講呢間最近市區既球會，坐的士大概25分鐘，車費約60元，呢個場係由當地保利集團建造，呢個集團主要做房地產，最近仲收購左江西南昌既銘雅高爾夫鄉村俱樂部，講返呢個場，剛剛開埋南場，連同舊有既北場，總共有36洞。

今次只夠時間打左北場(舊場)， 球場屬山場，落差好大，大部份都係先落後上，好多時候都要飛崖過樹，有好多狗腿洞，可以偷位走捷徑(當然要有番咁上下準確)，沙池水障都有，但係唔算好多，企上Tee 台個境都幾震撼，好大壓力，不過球道落點其實都幾闊，只要唔係太過份亂飛都唔係太大問題。果嶺斜度偏高，要小心D推。
隔離呢個係第七洞 Signature Hole，都幾靚架。

全部響水準之上，草坪夠綠兼且夠密，正。

Caddie都好熟場，資料夠又準確，幾好

呢個場好近市區，估唔到落差都係咁大，打落都好刺激，D狗腿洞可以偷位等第二杆好打D，變化多多幾好玩，但第一次唔熟場，所以打得保守D，相信熟場後再打會更好玩。
保養做得唔錯，可以收貨。
景觀原先應該幾靚，而家起左好多別墅，又有D工程，又有D燈柱，影響左冇咁靚！
打波時亦見到較新既南場，感覺較北場平坦，多D水。
整體黎講唔錯！Eagle 04 / 08

聽球會講，本地打波人數只有一千多，球場就有五個(就快六個)，唔怪之得我星期日打都唔塞車，仲好"他絛"添。今次到重慶，大開眼界，原來咁旺(真係鄉下仔出城)，同深圳有得揮，除左打波之外，仲食左正宗既重慶火鍋，正斗到非常，比起香港同深圳，都完全唔使比較，諗起都流口水，遺憾係未有時間去遊覽一番，尤其係大足石刻呢個名勝，唯有下次去補番。