想打呢個場好耐，可惜一路都未有機會，直至早兩日收到個網友電郵話因為景仰我球技高超(講笑咋)，想同我砌番場 - 冇問題！小弟從來都唔會拒絕打波....何況仲係member guest價添 : )

當日一早起身'恤靚'個頭，趕去搭船(亦可在東涌轉車)，航程要半小時同要在碼頭左面轉穿梭巴士上山(約7-8分鐘)。

經過一輪上上落落，始終見到球會既會所，個大堂雖然唔係大，但幾正播！D員工亦幾有禮貌。

跟住望下個錶，死喇！就黎夠鐘開波，點解仲未見個網友既？唯有頭耷耷，左望望，右望望，睇下有冇人認得我個貓樣？個心就諗.......唔通老貓燒鬚俾人點左入黎？好在行到落出發台有個同我差唔多咁靚仔既人行埋黎問我係咪布魯士 - 掂哂！

上面講過球會剛番新，幾企理，Proshop既員工服務都唔錯，致於餐廳係點就唔清楚(因為雞咁腳咁去左打波)。

未打之前聽人講個場有三多(多彎，多上落同多blind shot) - 果然冇錯，如果唔係有個friend帶住點打都幾 頭痛！因為D球道忽左忽右，上上落落(打波時會高
低腳)，間唔中又有O.B.要認真小心，亦由於個場位於山上，如果有風就會大大鑊........
打波之前考慮過上述原因，知道會危險 - 縮左去打 6,044碼既翡翠/鑽石黃tee，打落發覺比較實際短左 ，可能係多落斜既關係，如果打籃tee就會難好多。

個場D球道同果嶺保養唔錯。

個球場環境就靚到不得了，攪到我一路打一路左望望 右望望，有處仲望到銀礦灣。

個場冇球僮服務，各位老細可以坐車或自己拉車仔(不過好多上落斜)。

對個場各方面既感覺都唔錯(球場設計有D似滘西、三九同清水灣場既混合體) - 唯一既投訴係在球道上冇乜距離指示牌(Distance marker)，攪到我有幾桿打過龍或打短左，同D轉彎既blind shot幾多，冇人帶住會好易出事。
Eagle 10/2003

難度指數 : (黃發球區) ，由於黃tee較短，只係僅僅夠四隻辣椒難度。

球會設施、服務   球場設計  球道、果嶺保養 球僮服務及場地認識  N/A 球場綠化、觀景