個球會會所同有夜燈光9洞終於在03年9月起好左，所以立即飛奔去睇過呢個由我既偶像Colin Montgomerie首次在國內設計，帶有蘇格蘭風格既Link style場。

個場從九州港坐車去約35分鐘，大概用左人仔100蚊，依家球會己經有定時免費巴士，如能配合打球時間就的士費都慳番。

當我坐車入去會所時，第一個感覺係好似航港，地勢平坦，又好多水同Bunker，好多"倒影"球道；以為都好碎料，點知打落一D都唔簡單，雖然球道都幾寬闊，但間中會好大風，D超巨型沙池(我數過1-18洞有成97個...仲未計19-27洞！)同水障下下係落點等你個波，又非常多greenside bunkers， 除非你係"打沙高手"，否則都幾頭痛，加上如果D旗插落個green個"衰位"，後面就係水；仲有個藍Tee相當長，足足6,000米(6,600碼)。總括黎講，個場睇落好簡單，但打落就係另一回事，要小心處理，如強攻就好大機會出事。另外要講下既就係個場好易行(Tee台同果嶺行幾步就到)，如果唔係太熱可以慳返部球車費。

球場最印象深刻係綠化，長草區種滿紅紅既草同綠色球道形成好大對比，非常之靚仔；最近去見到仲加左好多大樹，除觀感美化外亦可以幫手擋擋太陽；個場整體上只係略嫌1-18洞比較平坦及較少變化，望落條條球道都差唔多一樣，而19-27洞相對之下就多D變化同Dogleg，打落亦較刺激同難度亦高D(因為有3,148米)，如果地勢加番些少高低起伏就好玩D。

Play Video..........

個場既主要設計及難度在於D'豪宅"size沙池(個個都五房兩廳 - 幾千呎大)同球道邊既水，因為你毋論在邊條球道都會有呢兩樣野，只要一Hook或打Slice就會出事，在加上有成6,000米距離令我覺得難度幾高下，想打得好就要練好D打沙技術；007有個高手朋友(差點2)話，千祈咪比呢度平坦既觀感誤以為好易打，其實個設計隱藏殺機，每次落點唔同，都會影響進攻策略，係一個越打越覺得有內涵的設計，是否屬實？就由你打過之後自己決定喇。

個場另一好處係冇乜飛山過水，對球技普通的球手如打白Tee就會幾適合。總結係除左果嶺外，毋論球會會所、設施、綠化都見進步，值得嘉許。 Eagle 05/06年