呢個球場在04初全新落成，位於惠州市中心的新區，屬於市區場，由皇崗出行左1.5小時車程。

正式會所於2005年11月28日正式啟用，球場附近亦建左好多巨型別墅以供大客戶租用。

會所好有氣勢，入到大堂一睇，豪華得黎好舒服(冇果種太高檔唔自然o既感覺)，裝修好講究，個男更衣室直情係King Size，D Locker 可以企成個人入去(女更衣室我就入唔到，但聽講都係Queen Size)，仲有個滿天星大水池及按摩池，非常正！會所有西餐廳，亦有中餐廳，另外足浴按摩亦即將啟用，仲有多個會議室，呢個新會所仲有176間酒店房，亦一樣佈置得好雅緻。

相當滿意！呢個市區場幾特別，並唔似其它市區場咁平坦，好多起伏，上山落山，左右狗腿，直路，Island Green乜都有 ，打落都好過癮，呢度有兩個藍Tee(6,074/6,223碼)都較短，如果你功力有番咁上下可以考慮打金Tee(6,593碼)，至於果嶺除個別之外就大部份都比較平坦，斜度並不大。

08年尾果嶺中毒，搶救左大半年，終於手術成功，而家己經回復返八成(同最靚時候比)，對推杆冇影響，你地睇下。(Jul2009)

球僮對場地及果嶺的認識成熟，又勤力，滿意。

雖然係市區場，但係同其他市區場如名商、沙河、君蘭等球會唔同(其它比較平坦)，呢個場一樣有上上落落，極有趣味性，個別球道落點頗窄、準確性要求亦高，雖然藍tee只有6,000-6,200碼左右，但你千期唔好睇小佢，因為難度亦有番咁上下，想穩陣你可以考慮用長鐵或fairway wood開波，避免打穿有dogleg的球道同減低風險.......如果嫌藍tee唔夠勁，可以上金tee.......不過就長6,593碼，難度同挑戰性就更高！

呢度再次提醒大家，如果你未打過，在有blind shot的時侯(一般都係Dogleg....睇唔到落點，加上攻部份果嶺時要過崖或水，一定要小心處理)最好開架車上前面自己望清楚先打波。

至於觀景就因為位於市區，場內會見到附近D建築物，而後九因為有夜燈，會見到D燈柱，好在個場既環境同園藝都算幾靚，而家D樹木更高更大更密，變得更靚。

總結：個場設計得有心思、球道千變萬化，有較容易的球道亦有高難度的俾你玩，極有趣味性，估唔到一個"名不經傳"既設計師亦可以做出一個'正'場，呢個場比部份所謂高手設計師的球場更精彩更好玩，打完18洞之後仲一路回味無窮！所以世事冇絕對，未必一定要出名先係好野。

會所就好正，裝修講究得黎自然舒適，配套亦非常足夠。就算打兩日，因為球會就響市區，吃喝玩樂都十分方便。

最近高速修路，最好預鬆D時間。(Jul2009)

果嶺回復返水平，加返分，升級至 Ace July 2009