呢個場響泰國知名度非常高，好多球友打完都大讚，007又點可以錯過，好，出.......發發發！！！(執筆時剛收到消息，被Asian Golf Monthly評定為"亞洲最佳球場第七名") 恭喜！恭喜！
從香港坐左2.5小時飛機到曼谷，我地今次人多，所以租左架大巴，結果連埋中途休息坐左2個鐘45分鐘到球場既姊妹酒店 Springfield Beach Resort.相信細車會更快， 而球場就離呢度大概15分鐘 ，球場旁就有另一間姊妹酒店 Springfield Village Resort，住係度打波會方便D，不過我地就喜歡住近海灘，所以揀左Beach Resort.

接近極品！保養非常正，球道草厚柔軟，果嶺順暢草密。May 2009

Play Movie....

呢度冇太大高低起伏，不過趣味性仍然相當高，左右狗腿，半island green，沙池同水障都等住，唔係做裝飾果種，雖然球道都算幾闊，不過千祈咪以為可以亂黎，一樣會俾D沙池難你，A場較闊，B場就幾多水，C場亦有D水而且落點較其餘兩個場窄D。果嶺有D幾巨型，On錯邊都幾頭痛，大部份都有斜度，有一定難度。

上次只打左AB場，今次打埋C場，一樣咁正，草坪水準上次巳經相當高，今次更加冇得頂，正呀！趣味性不俗，難度適中，o岩晒我地呢種Leisure golfers，就算打壞一球，如果唔係太離譜，仍然有機會recover，較少OB冇咁大挫敗感，三個場以C場難度稍高少少。

景觀方面就相當相當靚仔，樹木既成熟，又冇礙眼既別墅燈柱電線等，簡直係享受！打打下仲會見都棵神樹，圍晒絲帶上晒香。

會所唔錯，更衣室又大又企理，所有員工都殷勤有禮，Marshal亦好勤力週圍巡。

樣樣都有高水準，唔駛講最少要俾Ace 。05/09

我地住既 Springfield Beach Resort 就係咁樣，離市區唔使20分鐘，球會叫的士出去單程收Baht350，回程可以坐街邊D的士，冇錶睇要講價，Baht200 有交易，有D的士仲可以坐八個人；華欣市唔係好大，好快行完，大街有間運動店都幾多Golf野買，特別係手套比香港平，我都唔執輸掃左十幾隻。如果要住靚D，呢度都好多靚酒店如 Sofitel, Hilton. Marriott, Hyatt 等，特別一提響Sofitel 酒店裡面有間泰式餐廳，環境正斗，食物都唔錯，價錢亦合理。
華欣遠較曼谷、芭堤雅寧靜，較適合渡假和"攤抖"，而且天氣亦冇咁熱。