因為要完成個小小心願打哂廣東省D球場，呢幾年係國內頻頻左上右落，左右開弓，左右逢源，左擁右抱.........在幾十個球場打波跑左咁耐，冇邊個場既老板令我可以寫個"服"字 ----- 除左呢個場，點解？

因為呢個場既位置"吊腳"到亞媽都唔認得，從皇崗去要行成5粒鍾(連停車小息)，其中兩粒鍾仲係要經幾個有民初同清朝feel既小農村！咁都未止，去到山腳再又要半粒鍾行條有D似飛鵝山既小路上個在山腰既渡假村(去球場再要坐多十幾分鍾上山 (個場位於海拔800米上)。

淨係見到條咁勁既上山"排場"，就已經佩服個老板既決心.........同財力！真係少其中一 樣都唔掂，原來個老板係到起球場亦有個感人既故事............(原來球場本身係個茶園，係由一名馬來亞華僑所起，而家由五名台灣人承包黎做(其中一個就係講故仔果個)，呢位華僑為乜係道起球場？

原來呢位仁兄個母親大人本來就係附近條大洋村居民，更叮囑阿仔發達後一定要返去故鄉盡盡力，攪好佢，一定要"亞仔好，亞媽好，條村更加好！" 所以用左三億人民幣！真係佩服呢位仁兄既孝心，個場亦順利在99年11月開張大吉。

個會所算幾大下，餐廳亦幾舒服，locker乾淨企理，至於員工除左反應慢D之外服務算O.K。

個場環繞多個山頭而建，D球道仲條條都有個'龍'名，非常有氣勢架！

球道似三九咁窄，仲長D (藍tee有成6,741碼。佈局似世紀不過仲勁D............. 其它你可以想像。

球道同果嶺保養都算O.K，可以收貨。

不過個場既環境就幾靚下，淨係睇下個景1，2，3個人都醒哂，打波都好D。

比較參差不齊，最好同caddy master要個好D。之前較舊既四人球車已開始退役，今次去用已有新車用.....但如果多人，球僮就要自己在各山中穿梭，腳骨力少D都幾係！

個場主要分兩部份，一為位於山腰既渡假村，村內有渡假屋、卡拉O.K.、餐廳、 茶藝館 (可以試下D地道茶 - 幾好架)、仲有小型賽車等.........。

第二部份係位於山上靚到不得了既球場，天氣好既時候見到D大山起伏，好有氣勢！落霧既時候就伸手不見枝桿，好似騰雲駕霧咁，蒙查查，乜都睇唔到！

由於路途頗遠兼非常難先找得條路，冇熟人帶路就要預多D時間，天一黑就冇人幫到你。 亦因為位置吊腳，我地打左兩日波都唔多見到其他球手打波。

個球場難度甚高，比三九仲勁D，球道大上大落、左穿右插，又長又窄，飛崖過水等等，基本上冇乜水位走盞，一出線位就要差唔多要打定provisional..........如果可以應打多日，因為熟悉球道變化會比較好，打一場就要叫定好既caddy........否則就god bless you，好在大部份果嶺就都冇乜斜度，比較易推，否則就大單..........講左咁耐，有冇俾我嚇親？ 其實個場難就難D，其實大家可以打白tee或者放鬆心情.........儘量享受下個靚場啦！

另外在球會見到有位奇人，呢位仁兄係一日內打左108洞、頭54洞仲係打76-77，後幾場可能比較疲倦但都打80幾，勁！

個場既景色同難度在廣東算數一數二，有時間一定要試！

19 tick，打個 Eagle 4/04年