個球場位於惠州既博羅縣，建於著名旅遊景點羅浮山的山腳(落雨時個山好大霧氣，好似仙境咁)；之前幾年都只有九洞，會所亦係臨時，直到舊年年尾後九洞完成，不過只係響週末開放，球會正式會所及酒店亦攪掂；到最近，聽到D球友話唔錯，所以馬上起行去印証一下。

記得以前去球會只有走國道，D路又爛，坐車去未開波就已經好似被人打左一身咁，週身骨痛，印象認真麻麻。今次去發覺高速公路己攪掂，我地坐架四人車由深圳出發，走惠鹽高速轉廣惠高速響羅浮山出口出，跟住一條直路去大概10分鐘就到，全程用左1小時50分，比以前快得多及舒服得多，大車加多10-15分鐘差唔多。

個超巨型會所及酒店己經啟用，氣勢壯觀，球會前檯設於酒店內側，酒店大堂非常大，裡面有Proshop、lobby lounge、餐廳，二樓仲有個花園添，Locker room非常寬闊舒適，化壯間及沖涼房亦非常企理，酒店房間亦非常大；室外泳池俾住客免費使用；另外正興建緊一座水療按摩中心及一座演藝中心，據講話年底完成；不過餐廳食野唔平，一個肉醬意粉都要RMB48，份量就夠晒大；員工服務都唔錯。

呢到果嶺斜度亦多，推得好亦唔易 。

球道及果嶺保養中規中矩，可以收貨。

球僮表現又係中規中矩，不過不失。

四個字形容 - 脫胎換骨！同以前完全唔同晒！

呢處設計上非常剌激(好唔好玩就睇下你自己表現)，但肯定夠哂挑戰性保證唔會悶，由於藍Tee成6,600碼，Tee臺擺位又勺鑽，球道狹窄，第一次打可以考慮打白Tee，會冇咁多挫敗感。

保養亦可以，場內景觀比之前成熟美麗，不過仍然有D球道可以見到D村屋，美中不足；球道Distance Marker以樹作標記，球場內會發現響廣東場少見既楊柳。

由於後九啟用，前九球道分佈亦有所改動，同以前唔同左。

個場雖然離皇崗較遠，不過現在全程高速就舒服得多，值得一試。如果可以應考慮留低住一晚(間酒店D房都幾好)打多場會比較舒適。

整體比之前的臨時設施有大躍進，理所當然升班，Eagle。8/2005