球場位於西鄉市附近，離皇崗只需要30分鐘車程及約80元的士費，方便到極！深圳地鐵亦會去到球會門口(就快完成)， 不過如果的士司機唔知 "訂"你就要認住呢個場附近既碧海灣公園地標 。

個會所面積相當巨型，所有設施如餐廳、Proshop、Locker、酒店客房、甚至乎桑拿按摩都有(響另一棟大樓，即入大門口既左面)，至於餐廳D野食都ok，員工服務我都幾滿意。

前九屬山場，球道有唔少既起伏，設計變化多，每條球道都不一樣，有直路亦有大Dogleg俾你嚐試下唔同既打法。 頭幾洞難度較低等你可以熱足身，之後就有D難度較高既球洞比你玩，特別係第九洞既大Dogleg球道，超長Par 4，要兩記完美長攻加落點準確先有機會打Par！

後九洞臨近海邊，地勢平D，不過有三多，多風、多沙又多水 ，前幾洞較平，#15洞開始有起伏，亦係一個非常有趣既洞，後九Dogleg亦多，所以熟場後可以偷番D彎位第二杆冇咁難打。 有幾個Par 4 超長，要regular on 一D都唔容易。

最近 #2 洞加多左個水中果嶺，雖然球道短，不過要上果嶺及 hold住個green要有番咁上下技術。

至於果嶺就大部份都幾巨型同幾平坦，推桿會較容易。

球道及果嶺屬中等水平，比起我上次打既時候有進步，尤其係果嶺，不過今次稍嫌草長所以速度偏慢，剪一剪就爽晒。前九發球台做緊保養較多沙，後九就幾靚仔。

整體上不過不失！(02/2009)

球僮幾好，俾料都好清楚，最欣賞係呢度一對一球僮，可以專心服侍我 : P

Course Designer 原來同名商個場同一人 - Les Watts，呢個場長度比名商長，感覺好D。

設計上非常唔錯，前後九洞風格不一樣，但係同樣地咁好玩，有一定難度但唔係"夾硬黎"果種，每個洞玩法唔同所以都幾精彩，草坪質素比起以前有所改善不過可以再提升多D草坪就一流。

個場除左附近環境多D樓之外同近寶安機場 - 所以耐唔耐會有D飛機聲，不過就唔算太響。

整體環境有進步及成熟左，不過因為隔離起緊條公路去機場，第十洞同第十八洞會見到施緊工，影響左觀景。

另外，呢度18洞都有燈光夜場，而且日日都開，返朝九晚五既球友，手痕起上黎，放工都趕得切黎砌番場。

整體上屬於好玩球場，兼交通方便，唔錯 Eagle。(02/2009)

有時間可以去西鄉大道間"果香園"燒雞店試下，即點即燒熱辣辣、香噴噴，皮脆肉香，正到無得頂；仲有一間食Fusion 中菜都唔錯，除左食，呢條西鄉大道乜都有，足浴按摩唱K樣樣有。