舊年長征去汕頭時其實已經發現呢個球場起緊，直至04年頭，18洞正式啟用，其實佢另外仲有9洞已經起得七七八八，依家正響度養緊草，相信好快全部投入使用；入到球會發現一個好大模型，先至知道原來呢27洞只係計劃其中一部份，呢度個老闆仲要發展埋對岸個島，島上再起9洞！仲有大型渡假村、水上樂園、露天歌劇院等，更會整條好似海洋公園D吊車連接兩岸(不過真係唔知佢點解決大風呢個問題).....好厲害！

講番個球場，原來係由IMG負責設計，唔怪之得覺得似曾相識既感覺。
由皇崗出發，大概兩小時車程，球會就係深汕高速后門鎮度(高速公路旁邊)。

會所未起，家陣只有臨時會所，同個練習場共用，個練習場就非常靚仔，有間細proshop，餐廳位於三樓，不過二樓有幾間包廂都可以用，男更衣室係間臨時屋，不過locker沖涼設備都齊全，服務都ok。

如果想住一晚都得，球會在海邊起左一幢樓，仲有套房，環境都幾好。

個場非常開揚，草種、設計都好似金灣，不過變化比較多，頗多水障礙，沙池都唔少，打落都好玩。

最攪野係有兩條Signature球道#14同#15利用旁邊個沙灘做成個超長沙池，好有氣勢，如果水退打落沙灘，仲可以打番上 Fairway！ 由於呢到係海邊場，所以D海風都會係障礙之一，好在果嶺唔係好多斜度，推杆唔算太難。

球場開始成熟，園藝亦好左，果嶺做緊換草工程，所以打波當日有部份GUR，相信再過幾日就變番靚仔。

球僮質素參差，有待改善，不過服務就幾好。

呢個Links Course係廣東獨一無二，直情係靠住個海邊沙灘黎起，成個美國Pebble Beach咁！ 睇住個南中國海打波，認真盞鬼！

個場雖然比較平坦，但設計好有心思，變化都幾多，由於藍tee只有6,268碼，唔算太難打，不過如果遇到吹勁海風就另作別論。個場有兩隻吉祥物幾得意，另外場內種左D野菠蘿樹，幾特別，不過執波小心被"吉"親 : )

今次去見到球會附近多左好多海鮮酒家，可惜我無時間試，各位去完麻煩話番我知
好唔好味。

暫時Birdie，但稍後有潛質打高D分。9/05年