之前己經係報章上知道深圳會起三個亞公球場，亦知呢個位於龍崗既差唔多起好(之前去惠州湯泉途經)，但勢估唔到咁快就有球友(Thanks, DC!)在討論話己經攪掂，同可以試打！邊個話我地祖國做野冇效率？個場價錢亦算幾平！

我一收到風，仲唔飛撲試場同寫個球場評論俾大家，仲點叫自己高球007？前度武林盟主，萬千靚女都景仰既英俊會長？

個場雖然新但位置唔算難找，經布吉上水官高速，一出收費站第一個路口就左轉就O.K同會見到路牌。從皇崗去要約40分鍾，搭的士連高速費約110-120左右，從羅湖去應可快少少同平D。如果司機唔知'訂'可以試下問人個地標'自行車賽場'或龍口水庫 係邊，附近住既人都應該知。

個球場會所已經起好，雖然細細地不過都算OK，餐廳同Proshop亦正已做妥。至於服務就覺得前台、練習場同locker既員工都唔錯。

雖然唔知邊個設計，但個場都有D變化同幾好玩 - 唔錯。
呢處頭九比較容易同平坦，後九就難度高D亦較多上上落落，如果你唔Fit就要book球車，否則會好容易冇氣同抽筋，慘烈情度差不多勁過滘西北場。

至於果嶺就大部份都有小龜背同多斜度。最後係個場除少部份球洞有幾個巨型沙池之外，其它較少同較淺 - 打出唔難。

新九洞就建於山上，球道非常狹窄，好多盲點，果嶺亦唔易應付。

個場可能太多人打，保養就跟唔上，開始"散散地"，果嶺亦有D凹凹凸凸同幾多Bumps未修好，草比較長、速度慢，增加推桿難度。
個場觀景大部份都幾好，差D既只係有一兩條球道在高速公路邊 - 有小小礙眼同車聲。

今次D球僮對地形碼數認識都OK，不過對球例就差D

個場既收費都算合理，不過保養差些少如果好番D，肯定佢一定會變為另一個滘西洲
: ( 有得睇，冇得打。

球場大部份球道都算幾寬闊，整體難度雖然唔算太high - 不過都有多條球道要過水飛崖，如果開波唔穩定都會幾頭痕，高難度D既就只有幾個同主要在於開波距離，所以難度可以講係剛剛好，想打得好就睇清楚我D球道相片，因為會有幾個blind shot，熟悉球道會慳幾桿架！

新九洞比原先18洞要難得多，雖然唔係長，但容錯性非常低，新手最好都係打番BC場，唔好夾硬打催毀晒自信心，新場園藝仍在動工中，遲D環境應該更靚。

最後係球場現時毋論在平日或假期都幾多人，間唔中會出現大塞車，希望球會能夠改善，普渡眾生，令我地可以打多幾場平波，阿彌陀佛！Birdie 5/2005